2011/06/14

قصائد متنوعة

قصيدة : صفحة مقلوبة


حـياتي صفحـة مقـلـوبة فى وُسـط كــتـاب
ورق أبيـض ومنقـوش فـيه غـرام وعـذاب
حروفى سر مش معـروف ومن غـير بــاب
كــلامـي لـُغــــز متفــســر لـدى الأحــــباب
متــدخـلــشي علي قلـبى كــــده بتــرحــاب
لازم تــسـتــأذن الأول  ولـــو فى جـــــواب
وتعرف إن مش مـسـمـــوح بـــأي عـتــاب
لحد مأشـوف بقى وأقــولك على الأســـباب
فخلـيـك عــارف إنى أقـــدر ومـش كــــداب
هـعـامــل قلــبك الملعـــون كـأنــه ســــراب
لكـنى بــرضه مـش زيــك طـــويـل الـــنـاب
ولا عمـرى هكون انسان بعـيش فى الـغـاب





قصيدة : صفحة مقلوبة فـ ( جريدة بيت التحرير ) شمس بكرة


ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



قصيدة : حدّد ملامحك


 

وانت جـاى من سـنة ضلمة
هـات معـاك الـنــور بنفـسك
وللا عجــبــك تــبقى عــتمة
والســـواد قــاعــد ينـافـسـك
جاى بيلحق فى الدقايـق
وبيـســرق زى الـــدَنئ
إنت لــو عـاقـل وفـايـق
إسـتـحالـة تـكـون بـطئ
يبقى لازم تمشى دُغرى
تسبق الخطوة فى ثوانى
وقـّف الســاعة بإيـديـك
خلى ضـوء العتمة فاني 
فـكــــر الأول وإنجـــز
كــام شــعاع تقـدر تأيد
بـس لـو هتكـون مرّكز
هـتستـفاد علـشان تفيد 
خلى ليك شـكـل وملامـح
سطّر إسمك فى اللى جاي
إمحي مــِـت سـنة فـاتـت
جـت وعــدت . يـالا بـاي 
واحنا زى ماعشنا موُتنا
والسـنـين بتـزيد ضباب
ليه بنـزرع فـ اللى فاتـنا
ونكتب الرحلة فـ جــواب
كـل مـا هنــقـدر نــنوّر
كـل مـا نـقـــرب سنـين
فتـّش فـ الماضى ودوّر
واعرف إنت واحنا مين

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



قصيدة : مـزاد علَـني

 
مزاد علني ومين شارى .. قلـوب متباعـة أجبارى
قلوب عاشقة . قلوب صادقة . قلوب مجروحة مش فارقة
مزاد علني ومين شارى .. دا سعر قلوبنا فى العالي
قلـوب خاينة . قلـوب جـارحة . قلـوب خـدّاعة مش بـاينة
مزاد ومافـيش مـابيـنا فصـال
هنبـدء بـاللى كــان فى نضـال
وقـرر إنه هيضحى .. عشــان يفـرح لسعـدُه فى يــوم
عكـس ما كان ده متـوقـع .. بـإن الحــب لـيـِه هــيدوم
فلمـا حـب يستفسر .. بدء يفـهـم حـاجـات من نـار
وواحدة واحدة إسـتوعب .. وفى الأخـر طلع بقـرار
يروح لمزاد يبيـع قلبه .. عشـان مباش فى حب أكيد
دا عين العقـل واللهي .. ياريـت كل القلـوب دى تزيد
عشـان نقــدر نبيـع أكـتر .. ونسـترزق يـا نـاس منهم
دا كل ما كان فى من دا كتير .. هيجــوا عشان نتمنهم
فـ مين بفلـوسه دلوقتي  .. هيـدفع لينا كده وقتي
وياخد قلب بالغالي .. مزاد علنى ومين شارى
 مزاد على قلب كان مصنع .. لأى بــنات
لكـل بضـاعـة فيه بيجمع .. ودى بالــذات
بضاعة رخصية مايدُرش .. لو إتصـدرت
تقـولـه يا قلـب ميصحش .. يقــول قِضّيت
تشوفه ياعيني متّكـيف .. وحـابـب إنـه بيظـبط
وعامل حجتـُه دايمآ .. فى حـب  بنات بتستعبط
عشان حبوا فى قلـب مريض .. لأخـر يــوم فى أيــامه
هيفضـل زى كلـب أكـيد .. مالــوش ولا ديل فى أحلامه
وعامل نفسه إنـه حـويط .. مسـيره فى شر أعماله
يطـُب زي الخـروف فى العــيد .. ويتعـلــق بـأفعاله
 ودى مش أخر القصة .. أكـيد لسه فى منها كتير
قلوب عـايـشة بتتسـلى .. بحُب فى حُب حُب الغير
كانت دايمآ تقول على طول .. الفرصة أكيد بتتكرر
كتير أصلي اللى كـان شـايف .. غلط دلـوقتى بيبرر
عشان يكسب فلوس بكلام .. ده جانا عشان نبعلُه قوام
قلوب فى الحب طيارى .. مزاد علنى ومين شارى  
مزاد على قلب كــان فاضي
وعـامـل نفـسه مـِـت قاضي
فى حُب قلوب .. كانت دايمآ بتتكلم معـاه فى الحب
وكان مكتوب .. عليه يسمع وينصح كل قلب وقلـب
يفرق عمره ما يجمع ولا يدمع على الميت فى حب مالوش
مجـرد بس يستجمع كـلام بيقــوله مـش أكـتر مـابيحسوش
ده عـايش صـــور من بــره .. وكــذا مـره .. يـداري حقـقـته عن نفسه
فى عـز الضلمة بيـبان .. قناع ملبوس ف إنسان .. وبيغش اللى بينافسه
يضلل قـلب عن حـبه .. ويبعـد حـب عن ذاته .. وفـ العـتمه بيـندهله
عشان يفضل وراه دايمآ .. ويمشي فى ضله مش شايف .. ويحتاجله
بيقنع غيره بالجنة .. فى قلب النار بيستنى .. يــاخد حد مــالـــوش فـ الحـب
عشان يفضل يقول أكتر .. فى حب الغير بيسـتهتر .. ويجـرح كل قلب وقلـب
بكام هيسوى دا قولولى مالوش ولا سعر بصولى
قـررت أبيعـه مجـانى .. مـزاد علنى ومين شارى

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



قصيدة : مش لازم أحس


مِش لَازم أحِس بزياَدهَ
وأدوُق طَعم الألم والخوُف
أصل الإحساَس مامُش عاَدهَ
دهَ طبع وفى القلوُب معروُف
لكن برضُه فى ليك كذا دوُر
تقوُم بيهُم وتبقىَ فخوُر
وتفضل عـ القلوُب بتدوُر
وفى الأخر تعيش وتشوُف
ولو عايز تكوُن إنساَن
لازم تختاَر ماَبين أمرين
يأماَ تكوُن مَالكش حياه
ويبقىَ الحُزن لك موُصوُف
يا أماَ تعيش وتدي كماَن
حاجاَت مُمكن تعَدي العين
وتاَخدك مـ الألم وطوُف
فى دُنيا ماَليها كدب وزيف
تقاَبل فيها ناَس بالكيف
ومن حيرتك تناَم تخطيف
وتصحىَ عـ الأمل ملهوُف
تلاَفي الحلم ناقصُه كتير
ودايمآ تبقىَ عكس الغير
مُجرد وَهم شوُفته فى بير
يروُح وَخدك لحد الجوُف
عشاَن تفضل عاَيش فـ كابوُس
يقوُلك ياَبني عَدي ودوُس
بسيطة دي شكة الدبوُس
ماَفيش فيها ألم ولا خوُف
ودهَ برضُه اللى خلىَ الموُت
ياَخد بالُه ويجري يفوُت
على إحساسك المكبوُت
وجوُهَ القلب راَح مكشوُف
فى لحظهَ واَحدة تتمادهَ
وترجع دُغري ولاَ بتشوُف
مين اللى حس بزياُدة
ودَق طعم الألم والخوُف

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ





قصيدة :  زهرة الصبار


قـالـــوا العـجـــــب فـــــيها
كانــت حــديــــث الـنــــاس
توُهــــنا فـ صـحــــــاريــها
وغــرقـنـا مـ الإحـســـــاس
مــن غـــير مـانـــرويــــها
تطـلـع جـــزورها أثـــــــاث
تطـــــــرح بمعــــانيــــــهـا
أنــــوار كـ ضــى الـمــــاس
تعــــرف تكـــــون ليـــــهـا
لكــن بـــــــدون حُــــــراس
تملـُكــــــهـا بــإيــديـــــــهـا
وانسى تـكــــون بـإيـديــــك
مـاســــك الهـــــوى فـــيـها
علـشـان ده صعـــب علـيـك
تـقـــدر تـكــــون عــاشــــق
مـاتـكـنـش ليــهـا معـشـوق
ده الســــهـم لــــو راشــــق
تبقى إنــت جـــوه الـطـــوق
مــــربـــوط ومتــسـلـــســـل
محــبوس فى خـُلــخــالــهـا
تتــــمـنى يــــــوم تـطـــلـــع
لــو صــورة فى خــيالـــهـا
هتشــوف ربيـــــع الحـــــب
طــــــارح فى بُســـــتانـــهـا
أجمــــل كـــلام فـ القـــــلـب
هتـشــــوفـه فى عــــيـونـها
هـتحــــــــس بــالــدنــــــيـا
وبطـــــــعـم جـنّــتــــــــــها
مـ الشـــــهـد راح تـــاكـُــــل
وتـــــدوب فى رقـتـــــــهــا
تـســــــــكـر وتتــــــــاخــــد
وتــروُح لـــــبـاب بتــــــهـا
عـمّـــــال تنـــــــاديــــــــهـا
يمكـــن فى مــــره  تطـُــــل
تـــلــمّــــــح تـــلاقــــــيـهـا
زى الـقــــــــمــر بتـــــــهــل
والــنــاس أكــيـد شـــايــفـه
صــف الـرجــــال واقـفــــين
والتـُــقــــل ده صـــانــــعــه
والســــــر مـــن حــــرفــين
قــالــــوا علـــيـهـا كــــتـاب
صفـحـــــاتــهُ مســــطـــوُره
كـلامـــهـا من غــــير بــاب
لـكــــــن دى معــــــــــزوُره
دى  زهـــــــرة الصــــــــبـار
الكــــــل فـــــيـهــا إحــــــتار
من طبــــعـهـا يـــا ســــــاده
وشـــمــســــــهـا الجـــــلاّده
زي الشــــــمـعـة مـــــــتـأده
بنـــوُرة جـــــــوة الـــــــــدار
حــــواليــــهـا جـسـر متــين
والحُــــــــب مش عـــــــــاده
لـكـــن فـ غمــــضـــة عـــين
بتـشـــــوفـــــــها جـــــــواده
مـاســكـه الـلجــــام بالإيــــد
والطـــــــمى تحــتـــــــــيـها
فـ الأرض فى تجــعـــــــــيـد
لكــــــن ده مـــش فيـــــــهـا
والصـــــــبر ده إيـــــــــراده
جـــــواهــــــا زى الــــــــنار
إكــــتب واقـــــول أشـــــعـار
دى زهــــــــرة الصـــــــــبار
اللى إنـكـــــــتـب فــــــيهــا
مســــروُد كمــــا الأمــــطـار
فى الـــــبـرد نــــــلاقــــــيها
واخــــــدانـــا بــإيــديــــــها
عـلـشـــــــان تـــدافــــــــينـا
طـــــب مـــــين يـــدافــــيها
أســـــــــوار لـ جـنتــــــــهـا
أبـــــوبـــــهـا زى الـســــــد
مفـــتـاحــــــها مــش لـــيها
يمكـــن يـكـــــــون مـع حــد
ويمكـــــن نتـــــــوُه فـــــيها
لـكـــن قــــرارهــا ســـــيـف
وقـــت الغــضــــب حـصــوُه
روحـــهـا كــ ضى الطــــيف
ولـعـطـــرهـــــا فـحـــــــــوُه
من كـــــــتـر مــــابتـــــــدي
بنـسـتـــــــــحـي منــــــــهـا
ولســــــه العـجــــــب فــيها
وبـنســـمـــــــعُـــه عـــــنهـا


ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 

قصيدة : جمـــع وطـــرح ؟




بـَصُـب فى قـالـــب العُــمـر
سـنـين عــــدّت وبــالأمــر
بشـــيل الــــورد بــالجـمـر
وبـسـقي القـلــب بـالخـمـر
مُسـكــن لـلألــم والــروح
بيبعـد مـ الجسـد ويــروح
يقرب للهــوى المجــروح
وعـارف أن مش مسموح
يكون زى اللى عـدى فـ نار
طلع جلده فـ هـوى المشـوار
وفى الأخـر بقى المـدبــوح
فـ عز ما كان مالوش أعذار
لا بـالفـاتـوة ولا بالــشـرح
ولا بالقسمة جمــع وطـرح
بلـم الجـرح جــوة الجــرح
وداوي الحـزن وَيـا الفــرح
يـا حُــب الـشــوق بيتــغـير
سنـــين عـاجــز ومتحــــير
فـ خط من الحــياه قُـصـــير
أخد حلـم فـ هـــواه صـغــير
ومين قالك يا ضوء الشمس
هيحصـل اللى كـان بالأمـس
أكيد بكرة مافيش ولا همـس
ممــنـوع الاقـتراب واللمـس



ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


قصيدة : حرفــــــ( إن )..؟



قلبى حـب فى حـرف أن
شاف ملاك وطلعـله جن
حـلــم دا والـلا دا عـلــم
هو كان فى مكان غريب
راح يـدور على الحـبيب
قـصـة وانتـهـت بفـيلـم

هـو فى فـ الدنـيــا غـير

إنى اشــوف أفـلام كتير
فيها حرف الإن ماضي
نفــسى أتخــيل حـياتي
جـوة حلـم فـ ذكـرياتي
والحـيـاة بتمُـر عـادي

قلبى عاش ياجي مِت حكاية
كان بيتحـدى الســنين
والبــــــدايـة زي النـــــهايـة
ومعرفتش الإنه فين

ياما كنت عايش رومانسي
فى حكايـاتي تمـلي مانسي

بس لما قربت منك
قولت عنك حرفــ إن
كنت بـســــتناك لـــيـالي

سهر وحيرة شغلت بالي
ودلوقتى عرفت إنك
من بدايتك وإنت جن



قلبــــــــــــــــي حـَــــــــــــب فـــــــــــــــــــِ ..)
حرفـــــــــــــ إن ...؟



ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ 

قصيدة : بــــــــدوُن جـــــــــواز .. ؟


 
عشـان حبّيت وفكـرت إنى إنسانة
وثقت فـ عقلى توهني بـ تفكيره
رجعت وقولت معلش إنى غلطانة
فى حق اللى أساء ليا فـ تعبيره
عشان مبدء حافظت عليه ومن صغري
بعفـــف نفـــسي فـ مـرايـــتي وبتــدلع
على العرسان طبور واقفين ومن بدري
فى عز صِبايا كـنت لغيري مش بسمع
وعشت حياتي مسكينة بلاغي الحظ
أدوّر اللى راح مني فـ ورق يا نصيب
وبنّدب حـظي دلـوقتى وكــياني إتـهز
وبضعف كل ما بفكر فى شكل العيب
فقدت الثـقة فـ الـنـاس اللى فيـهم اللُــئم
شـطـان واخـد زنـوبي وجـاي يتوضه
فـ ضهرى شوفته واقف قال عشان يتـئم
واخدنى فى سكته فاكر إن ليهِ هرضه
عشان دلوقتى أسم الحـب بقى شهوه
بخاف على نفـسي يمكن مره أستهوه
ببرد الحـب لو صابني دا على سهوه
يخلي الـكــل طمعــان فــيا مســترخـص
 ودلوقتى خلاص أنا يعني مش هخـلّص
فـ نــاس عمّـالـة رايحـة وفـيا بـتنـقـص
تجيب شـربات وأقدم للعريس قهوة
أكيد الدنـيا مش واقـفـة لـكن دايرة
يلّف القطر من نقطة وصول فيها
يعدي جوازى فى محطة أنـا بيها
وزى ما فاتني فـات الكـل قـابلـيها
وفضلِت الحـياة ماشـية وأنا تايـهة
كـتير حـاولـوا يعــيروني عشـان أتهد
لقب حاطوه وري ضهـرى وزى السد
بعافر فى اللى مش حاسس بقلب الحد
بسنُه عشان ماكـنش فـ الهـوى طايرة
أنا معرفشي إيه زنبي وايه اللى أنا فيه
ليه بتعــاير عشـان مبدء حفظــت عليه
كـانـوا عـايـزني أتـنـازل وهـعـمـل إيه
ساعة ما أتجوز الحد اللى مش هوه
أكـيد هحـس بقـرارى الخـطأ وانـدم
هعيـش حيـاتي بتـمـنى أكـون بـحـلم
كابوس الدنـيا لو خدنى هموت قابليه
وهبقى لوحدى تعـبانـة ومن جـوه
أنا مش سهلة زى كـتير ما بيفكر
صحيح أنا بنـت لكن ممكن أتنكر
عشـان الـكـل يبـعـد عني لـو فكر
حيـاتي جـد مـش طلّـبة مـعــايــا هـزار
لا قـولـت لـحــد خــد رأيي فـ أى قــرار
عشان معـروفة مش محتاجـة إن أخـتار
وبسـتغـرب من اللى بيجي يتأنـس
عـايزاني أعيش معـاه الدور
وبتـعاير وايه يعني خلاص عانـس
مانِـش سـاقـيه هـلـف بطـور
إنوثتي جمالي وشـياكتي كانوا المظهر
وبوسـتى لخـدي ده دلــيل إنى بتمـنظر
ومهتـمـيه جــــدآ إنـى أتجـــوُز
لكن لـو كـان ده كلـه ضــريبة مـش نـافعة
خلاص مش عايزة أكون أنا واحدة مندفعة
يغوًر الحب لو خلاني أتـبروُز
واكون محطوطة فى رُكـن مـن الأركــان
كما الصورة اللى مبتمـسة فى كـل مكـان
ومجبــورة أعيــش واصــبر وأدي كمـان
جاحات لا يمكن أتحملها فـوق طـاقـتي
 أنـا مش عــايـزة حــاجـة تقـل بكرمتي
ومش محتــاجـة أتـكــلـم وأنـا فـ صمتي
دا شـرع الله مالـوش غير معنى متـفسر
ومن وجهة نظر ساخر
سمعت إنى دخلت رهان
وعكس الكـل ما إتوقع
مابعـتش حاجة بـالمجان
وفوزت بنفسي فـ الأخر
خــلاص مـش لازم أتكـلـم فى حـدوتة
حكـتـها كــل واحـدة عـايـشـة متـهانـة
حكايتي لازم أنهـيها تــوتـة يـا تــوتة
أنــا عـنّســت بكـرمتي ومش نـدمانـة

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



قصيدة : بتستـكردنى ؟



بتستكردنى .. وأنـا متـأكد .. بتعملى البحر طحينة
جايه تاخدنى عشان تتلكـك .. دبستني بنت اللزينة

قولت هدوّر عـيني وهـمشي
جريـت هي ورايـا بـسـرعة
قال إيه وَحشها ومابتنامشي

وإنى خلاص هعزمها الليلة .. يـادي النيلة
مالـك رامـية بـلاكي علـيا .. دا أنتي قاتيلة

أنا مـ الأول كنت بقول ماشية على الموضة
قولت ياواد متستكردها ولو ساعتين
لما عــرفتـها خلّـِت لـيلــة اُمي أنــا ســــودة
عمال بهرب من قدامها فـ الحالـتين

غلطتى أصلآ إن عرفـت واحدة ديكـور
طلّعت فاهمة كـل القصة وحابكة الدور

بذكاء روحت عشان أصتادها

إدتنى الطـُعم وشـدتني
كـنت بقـــول أنـــا مستكـردها
طلّعت هي بتسـتـكردني



ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


قصيدة : جواز صالونات



رافضت مبدء إنى أتجوز .. جواز صالونات
جواز تقليدي  .. وزى العادي .. قالولى متجرب مرة يا سيدي
قولـت لا يمـكن إنى أتسـاهل فى دى بالـذات
جابولى واحدة عشان أخطُـبها
بس لسـوء حظــها وعـــيوبها
إنى كنت رافض مـ الأوُل
قعدِت ساعة بحالها فى وشي
وانــا ســاكـت ومـا بتكلمشي
والوقت بيزيد ويطوُل
جت تتكلم أعمل إيه .. قولت أسلم .. طب فيها إيه
دُغري لاقتها قدام مني .. وبتسألني .. إسمك إيه ؟
قولت فى عقلي يا واد متجـاوب
كــنت بــرُد عليــــها واتــــاوب
وهي مصممة بقى نتعرف .. وعشان كدا رُحت سايبها
جت وقالتلي عايزة أتشرف .. إتشــديـت من إســلـوبها
قومت رَفعت عينيا فـ عـينها .. قولت أشـوفها لاقتني همـوت
كــان لازم مـ الأخــر أقــولها .. البنـــت طـلّعـــت زى الحـوت
شوفت جراءة فـ وش ملاك .. جـوة براءة فـ قلب هلاك
حاجة مش ممكن إنى أداريها .. جُم وقالـولى ها عجباك
ضحكوا ضحكة غريبة وعالية .. إبن إصماله مابيعـمرش
دى المحــروسة بنــت الغـالــية .. خـُدها ياواد ومتفكرش
بصتلها أنا بستغراب .. لاقـتها واثـقة من نفـسها
أخدٌت عيني لحد رمـوشـها ونزلت بيها لخصرها
راحت وقـفـه فـ وش الـباب .. سرقـت مني النظـرة فى ثانية
أمَرِت قلبى . إعملى حساب .. طـيب حاضر . قالـها فى ثانية
نظرة فى نين عيونها السودة .. خلت ليله أمى أنا سودة
لا وأيه ماشـية على المــوضـة .. يـــــادى الحـــــــوسة
مش قادر أبعد عيني عليها .. وأنـا بتخيل كل ما فيها
شوفت أنـوثة ماليها الحب .. دخلت قلبى وراحت ليها
وأنا مش هنكر إنى وقعت .. جـوة عيــونها ومنـها وفيـها وبيـها ولعت
من أشــواق الحـب الـتاني .. اللى ماكنشي فى بالي وجالي ومنه رجعت
كـنت خـلاص قربـت أجن
قولت دى ليا ولو فيها إن
مش هتروح .. غــير على بيـت جـــوزها
أيوة أنا جوزها .. وحلفت خلاص لتجوزها
وتممنا الجــوازة خلاص .. وبقــينا حكـايــة مـ الحكـايات
وفى الأخر قالولى الناس .. شوفت بقى جـواز الصالـونات
طلع الموضوع شكله نسب
وكل واحـد بقى على حسب
يرفض يقبل . حاجة تعنيه
أصلآ مش مفروض نتسرع
لازم نصــبر أيــوه ونســمع
كل حكاية . حصل فيها أيه



ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ












 

ليست هناك تعليقات:

إرسال تعليق

السلام عليكم ورحمة الله وبركاته

أحبائي فى الله أصدقائي وأخواتي وكل من قرء لي شيئآ من قبل .........
هذه مدونتي التى أردت أن أكتبها لكي أعرض لكم بعض أعمالي وسوف أعمل جاهدآ أن أضع
كل ما هو جديد لدي وهذا لكي تجد ماتبحث عنه ايها القارئ , ألم تستطيع تلك الكلمات أن تخترق
أسوارك العاليه وأن ترى ما بداخلك وما فى قلبك ؟ هذا ما سنعرفه وهذا ما أعمل عليه أن أراك دايمآ
هنا
فى مدونتي ويُسعدني أن اقدم لك ما تريد أن تراه وأن تسمع وأن تقرء ولا تمل من تلك الكلمات فقد تكون للبعض صورةً لـ حاله من الحزن والشجن وقد تكون للبعض الأخر تعبير عن حاله من السعادة والفرح والطمثنينه ولكن فى النهاية يَهُمني أن أصل بإحساسي أليكم وأن أؤثر فيكم وأتأثر بكم وأتمنى
أن يستطيع قلبى بمشاعرُه البسيطه وبإحساسُه أن يصل الى قلوبكم ويجعمل من قلمي شيئآ تنتظروه لكي تعرفوا كل ما لديه من كلماتآ جديدة ؟
وبالفعل يَهُمنى أن أعرف أرائكم دايمآ فيما أكتب وفيما أقدم لكم
فـ لكل مقامآ مقال ولكل مقالآ مقام ...
(هذا ما تعلمتُه من صغري) ... أتمنى لك أن تقضى وقتآ ممتعآ هنا فى مدوتني التى سوف تضيئها بشمسك الصاطعة والتى سيشرفني أن أراها تضيئ كلماتي المتواضعة
هذه .. تحياتي لك أيها القارئ العزيز ...